آخر الأخبار

الرأي الآخر

تكركيرة 20 : ولد الطبيب ما يجي كان طبيب بقلم منجي باكير

22:22

بعيدا عن الفلتات الدراسية و الوظيفية هنا او هناك فإنّه غالبا ولد الطبيب ما يجي كان طبيب و اللي ما يسمحلوش معدّله في تونس يجيب شهادة من بلاد برّة ،،، كيف كيف ولد المحامي مايجي كان محامي ،،، و حتى من ولد الرئيس – يحب يولّي رئيس أما ما ڨدّش روحو ،،، و زيد ببركات اتحاد الشغل و تدخّلاته – المفروضة – ولّى ولد اللي يخدم في السّياب يخدم في السياب ، و ولد اللي يخدم في الاذاعة يخدم في الاذاعة ، ولد اللي يخدم في الكنام و الا الcnss يخدم غادي ، ولد اللي يخدم في البورطو يخدم في البورطو و غيرو ….

اما بقية اولاد و بنات الشعب الكريم فلهم المناظرات ،،، و بعدها تجي تصفيات المقابلات البسيكولوجية ثم الطبية و الغربال يصفّي ،،، أولاد الشعب عندهم الكاباس و ما يقابلها يعدي و يقعد يستنى لين ينسوه …!

اولاد الشعب و خصوصا اولاد ( مباركة الحفيانة ) لهم شغل الرعاع ، شغل عسكر زواوة ،،، اولاد الشعب يأمّنوا عمل المدارس و السبيطارات و النقل و الخدمات و اعمال البناء و الفلاحة ،،، اولاد الشعب يأمّنوا داخل البلاد و حدودها من جيش و شرطة و حرس على خاطر الابيض و صاحب العين الزرقة و من شاكلهم ما يخدموش هذه الخدم ،،، و ما يستناوش 12 شهرية حاف ،،، هوما يهبروا هبرا و يعيشوا عيشا و يصرفوا صرفا … و اللي برجو بالمرمّة ….



nos sponsors