أغلب الاعلاميين والخرونيكورات متاع الاعلام في تونس العاصمة يبخروا بجلدنا وبصفاقس وبالسي آس آس

هذا رجاء من محب مخلص للغالية السي اس اس … رجاء وبكلّ لطف افهموا حاجة … راهو اغلب الاعلاميين والخرونيكورات متاع الاعلام في تونس العاصمة يبخروا بجلدنا و بصفاقس وبالسي اس اس ..عندهم في جيناتهم كراهية سوداء للجهة ولنادينا . خدمت في تونس ونعرف اشكال عديدة من هاكي الراطسة متاعهم مع احترامي لفئة قليلة من الشرفاء منهم …اذن اسمعوهم دائما بمنطق _ اسمع وفلّت _ اذا قدّم واحد منهم نصيحة تبدو ظاهريا لفائدة النادي … من داخل من داخل هي فخّ لجماهيرنا ..واكبر مثال على ذلك الموائد المنصوبة حاليا للحارس دحمان ..حتى اذا دحمان غلط هاكي امورنا احنا الداخلية نعالجوها في كوجينتنا ..اما وقت المصدر يولّي الاعلام العاصمي فذلك يعني ترهدين ونصب فخّ لدحمان ولينا احنا ..سؤال واحد باش تفهمو قصدي .لو كان جاء دحمان يلعب في فريق عاصمي مشهور تصير عليه هالحملة ؟؟ افهموها للمرة الاخيرة ..يكرهوننا ومنذ عشرات السنين …واللي يكرهنا موش فقط نقعدو بعدو اما حتى ولو مرّة كلّ عشر سنين نفقعولهم المرّارة متاعهم ..موش هكة يا زبير السافي ؟؟؟

عبد الكريم قطاطة