النائب شكري البحري يكتب …. أزمة الخبز في عقارب : الخبزة مرة

الخبز في عقارب نسموه النعمة هو أكثر المواد الغذائية استهلاكا في البلدة..مستحيل نطيشوه و إلا نلوحوه..
أكثر من 13 مخبزة مصنفة و 5 مخابز غير مصنفة
المخابز المصنفة قاعدة تستغل حاليا في اكثر من 84 شكارة فارينة بو 100 كيلو يوميا يعني (قرابة 8500 كيلو فارينة يوميا في عقارب للمخابز المصنفة فقط)
المخابز المصنفة من المفروض انها تنتج أكثر من 46500 خبزة باقات أو 25الف خبز كبير يوميا بخلاف مخابز صفاقس اش تجيب للحوانات و العطارة..و بخلاف المخابز الغير مصنفة اشنو تنتج .
……..لكن الواقع عكس هذا ….
50 ألف مواطن يتشكاو من نقص في الخبز ..
نصف النهار ما تبقى حتى قدمة و نقعدو نستناو في الخبز يجينا من صفاقس المغرب ونسبة كبيرة منو زادة تتباع علفة.
✅أغلب المخابز تسكر نصف النهار، العشية خبزة ما تلقاهاش ..نهار الاحد ..خبزة لا ..
✅الحوانت و العطارة ما يوصلهمش الخبز في عقارب
✅ الخبز في عقارب ماهواش قاعد يوصل للعمادات والأرياف
✅ كمية كبيرة من الخبز من غير خميرة
✅الفارينة قاعدة تخرج من المخابز و تتباع مرشي نوار
✅ثمة مخابز تبدأ تخدم نصف الليل و تسكر الخمسة متاع الصباح والكمية اللي تتصنع تتباع لزوز و إلا ثلاث فقط يجو يعبوها في كميوناتهم و اللي تكلمو يقولك ( عندي عرس ،عندي طهور …)
✅ الخبز في عقارب البعض قاعدين يستغلو فيه علفة للغنم و البقر وما نحكيش عل الخبز اليابس بل الخبز الطري الطازج
✅ أزمة الخبز في عقارب مرتبطة بالأساس بنقص في مادة الفارينة و مرتبطة زادة بأزمة الاعلاف خاطر الفلاحة ما لقات شنو توكل سعيها و غنمها و بقرها..
✅أزمة الخبز متسب فيها زادة غياب تام للرقابة والمراقبة الاقتصادية و عدم تفاعل الجهات المختصة لنداءاتنا المتكررة من اجل مضاعفة الكمية الخاصة بعقارب.
✅أزمة الخبز زادة متسبب فيها فشل منظومة متاع توزيع ودعم المواد الأساسية و منظومة الرقابة اللي ساهمت في تكريس الاحتكار و المارشي نوار….
✅أزمة الخبز مثل كل أزمات تزويد الأسواق بالمواد الاستهلاكية هي أزمة رقابة بالأساس ..الدولة التونسية يلزمها تراجع منظومة الرقابة المهترئة المشتتة المفتقرة للتشريعات اللازمة وأدوات العمل الميداني اللوجستية والعدد الكافي بشريا للقيام بالرقابة على أحسن وجه والسيطرة الرقابية على كامل مسالك الانتاج والتوزيع والبيع .. هذه مسألة ذات أولوية قصوى .
✅أزمة الخبز المدعم ما تحلهاش دفاتر التوزيع والتراخيص المسبقة بل تستوجب قرارات ثورية وعمل ميداني صحيح ودعم للفلاحة وخلق منوال إقتصادي بديل يضمن تحقيق الأمن الغذائي.
✅ حل أزمة الخبز و العلفة موش في بيان المعتمدية بل في حلول عملية انطلقنا في تنفيذها في عقارب كتجارب نموذجية ساهم فيها كل الاطراف :
منظومة جديدة لتوزيع الأعلاف تضمن حق كل فلاح في التزود بكميات الشعير و السداري . مشروع منطقة سقوية علفية تستغل مياه محطة التطهير المعالجة ثلاثيا .
_مشروع “النعمة” لتثمين النفايات العضوية و تحويلها الى أسمدة و أعلاف..
👈أزمة الخبز موش أزمة بلاغ و إلا بيان معتمدية بل أزمة مواطن عقربي يبحث و يدافع عن حقو في الحياة و العيش الكريم في منطقة مهمشة ومنسية….

كل المحبة للأمناء من أصحاب المخابز و صغار الفلاحين الشرفاء الذين يستميتون لرسم موطن أجمل 🌹

.