هيثم المكي ….سيبُّو قرقنة
حكاية البوليسية و الحرس اللي يمنعوا غير القراقنة من ركوب البطاح و الذهاب للجزيرة إلى متى ؟! بأما حق ؟؟ متاع شنية ؟!ياخي هالدولة الزبالة و كمشة الطراطير اللي شادينها عاجزين عن التصدي للحرقة عندهم سنين، و ما لقاو الحل كان في عزل الجزيرة و منع الزوار عليها ؟ علاه، ماهيش تابعة تونس ؟! موش من حقنا نتنقلو في بلادنا كيما نحبو ؟! آش قولكم تعملوها بالفيزا ؟حتى كان جات الحرقة مازالت ظاهرة في قرقنة كيما صار ثلاثة سنين التالي !!و بالطبيعة كل شيء يمشي بالتعليمات و ما فمة شيء رسمي، خاطر حتى شبه مسؤول ما عندو الشجاعة و الكرامة اللازمين باش يتحمل مسؤولية قراراته… إخيت !!سيبونا يا هموم، الوسخ و البترول و الكيس و الباندية اللي مسيبينهم علينا غادي يزي، باش تكملوا تعملوا لنا حصار بحري زادة ؟؟ بالكشي البحارة و المطاعم و الوتلة باش توكلوهم انتوما ولا الخماج اللي حطوكم غادي ؟!تي من الآخر، تحبوا نوليو نشعلو فيها على قاعدة ؟ و الله نتسماو مازلنا ممشينها ضبط نفس على الآخر… أما و راس مناظركم الحرفة لا أحب إلى قلوبنا من منظر حريقة تاكل العفن اللي لمتو هالحفرة الكل !!
مواضيع ذات صلة
